18. Apr.

Xièxiè

China II - Mitem Zug vo Chengdu quer dür China uf Peking und vo dert i Südweschte nach Kunming mit eme Abstächer uf Lijiang und widr zrügg.

Mittlerwilä si mir zimlech güebt mit grosse Bahnhöf. O ir gigagntische Peking West Train Station finge mer problemlos dr richtig Usgang. In Peking acho erwartet üs es prau gfüuts Programm vouer Hightlights.

Aus erschts schländere mir dür die änge Gasse vo de traditionelle Hutongs, de aute Wohnviertlu im Härze vor Stadt und löh üs vom Charme vo vergange Zyte tribe.

Es witers Highlight isch z'Träffe mitem Hailong, wo in Peking läbt. Är nimmt sech e Tag frei und füehrt üs dür di historische Stätte i dr Stadt. Zäme bsueche mer dr Tian’anmen-Platz, di verbotnigi Stadt und dr Himmelstempu. Bim gemeinsame Znacht und es paar chinesische Bier git är mit sire Fründin Iblicke ihre Autag – e spannende Perspektivwächsu für üs aus weschtlechi Tourischte.

Und witer geits. Mir träffe dr Jünggu, wo sit sächs Jahr in China läbt und uf dr Schwizer Botschaft schaffet. Für üs isches sit mehrerne Monate z erschte Zämeträffe mit öperem us dr Schwiz. Zersch wärde mer düre Garte vor Botschaft gfüehrt, när geits iz Apéro und speter de ines traditionells chinesischs Restaurant. Am Jünggu chöi mer aui Frage steue, wo üs brönnend interessiere und wo mer üs süsch nid getroue, d'Chinesinne und Chinese z'frage. Mir bechöme vili Antworte - diräkt, ehrlech und ungfiuteret. Wie isches mit dr Überwachig, dr Politik, was si gseuschaftlechi Bsunderheite und viles meh.

Dr Bsuech vom Art District 798 zeigt üs e witeri Site vo Peking: kreativ, modern und widr mau riesig. In China schint wük nüt chli z'sy - weder d'Gebäude no d'Ideä. Me chönt problemlos e ganze Tag i däm läbändige Viertu verbringe.

Es ganz speziells Highlight steit aus nächschts ah: di chinesischi Muur. Über 21'000 Kilometer läng und zum Teil bis zu 3'000 Jahr aut. Zmindescht e Teil drvo wei mer gseh. Dank eme Tipp vom Jünggu chöi mer üs ere chinesische Wandergruppe fürne gfüehrte Usflug aschliesse.

D'Wanderig entlang vor Muur isch spektakulär. Mit dr bunt zäsammengewürfelte Gruppe loufe mer mits dür di blühendi Böim. Mir gniesse di einzigartige Ussichte uf d'Muur und dr wunderschöne Natur rundum. Öper vor Gruppe isch Mitglied vor Kommunistische Partei – es spannende Gsprächspartner mit ganz interessante Iblicke i di chinesische Sicht uf d'Wäut und insbesondere uf Europa und d'USA.

Was üs immer widr erstunt: Trotz dr Grössi vo dere Stadt mit meh aus 20 Millione Iwohner und em dichte Verchehr gits erstunlech wenig Smog und Lärm. Dr Grund: D'Mehrheit vo de Fahrzüg si elektrisch ungerwägs - bi de Outos mind. 50% und bi de Roller sozäge aui. Mir si positiv überrascht, es ganz angers Gfüeu aus i de vile angere Städt wo mer vor China si gsi. O di grossi Azau Velofahrer:inne und di durchgehende Velostreife si sehr praktisch. Mir lehne regumässig Velo us und touche i Pekinger Verkehr ih.

China überrascht üs generell mit dr guete Infrastruktur: Moderni Bahnhöf, schnäui Züg und beeindruckendi Architektur - hie wird uf Zuekunft gsetzt. Mit eim vo dene schnäue Züg fahre mir witer i Süde nach Kunming. Hie isch aues grüner, farbiger, wärmer – und d'Mönsche würk entspannter. E Chinesin verzeut üs mit eme Ougezwinkere: Im Norde isst me meh Nudle – das macht starch. Im Süde gits meh Riis und Fisch – ds macht schlau. Angeri Chines:inne bestätige die Theorie lachend.

Nach so viune Megacities ziehts üs id Natur. Mit dem Zug geits nach Lijiang, Usgangspunkt vo üsere zwöitägigi Wanderig dür di beeindruckendi Tiger Leaping Gorge. D'Landschaft isch atemberoubend schön. Mir si erschöpft, abr glücklech üs mau wider richtig bewegt z'ha.

In China si Überwachigskameras augägewärtig. Und o üse Pass müesse mer immer widr zeige - zum Bispiu jedes Mau füre Zue- und Ustritt us eme Bahnhof, abr o füre Zuetritt zu verschidnige Sehenswürdigkeite. Ds hingerlat es komischs Gfüeu.

China zeigt sech abr zum Glück nid nume vor überwachende und ernschte Site, sondern ou verspielt und kreativ. Überau gseh mer chlini Figure, Stofftier uf Scooter und vili angeri farbigi Accessoires. O mir chöi nid widerstah und choufe üs e chline "Pongpong" für üse Rucksack - e Glücksbringer ir Form vo eme Tiger. Är symbolisiert Sterchi, Muet und Widerstandskraft.

China isch vouer Kontraschte – und genau ds fasziniert üs. So anonym d'Mönschemasse würke, so persönlich si di vile Begägnige. Me steit uf jahrtausendaute Muure – und zaut am ne Strassestand mit QR Code. So überwacht vieles isch, so individuell und läbensfroh schint dr Autag z'sy. Die Gägesätz begleite üs während eme ganze Monet. Es si genau die vile Kontraschte wo üs di verschidnige Site vo China zeigt und üse Horizont erwiteret hei. Xièxiè!

Iz blibe no zwöi Täg vo üsem 30-Tage-Visum. Es isch Zyt witerzzieh. Mitem Zug geht’s witer in Richtig Süde.