Mekong
Laos - Mitem Zug nach Luang Prabang und vo dert mitem Boot ufem Mekong nach Ban Houayxay.
Dür zwöi, dür vier, dür nüün, dür füfzäh, dür füfzg, dür sächzg, dür hundert, dür sächshundert und iz dür vierezwänzgtusig. Es neus Land, e neui Währig. Usem Bancomat chöme ei Million Laotischi Kip - rund 38 Franke. Mir verteile di vile Note und si bereit für zrügg iz Zytauter vom Bargäud. E zimlechi Umstellig nach China, wo aues nume no per App zaut wird.
Üsi Ireis nach Laos erfougt per Zug. D’Fahrt isch mehrheitlech entspannt. Nume für d'Ureis us China und d'Ireis in Laos bruchts churz e Effort. Mir schiebe beidi mau üsi Velokartons einisch düre ganz Bahnhof, düre Zoll und widr zrügg i Zug. Nach acht Stung erreiche mer de dr Bahnhof vo Luang Prabang.
Üsi erschti Ufgab: D'Velos nach vier Wuche us de Kartonchischte befreie und zämeboue. Ds wär nid so e Sach, abr mir merke, üsi Schibebrämse vore si abmontiert. Da hetts bim Ipacke in China äuä es Missverständnis gäh. Z'Problem: Ds Wärkzüg zum Azieh hei mir nid. Drzue chunnt no, dass d'Kabu vom Liecht usgrisse si. Das mitem Liecht bringe mir mit chli Geduld säuber häre, abr für die erste 10 km iz Stedtli müesse mir uf d'Vorderbräms verzichte. Kes Problem, mir nämes gmüetlech.
Luang Prabang füeut sech sofort wie Ferie vo de Ferie ah. Üses Hotel liegt idyllisch a eme Nebefluss vom Mekong. Z'Zmorge gniesse mir mit Blick ufs Wasser. D'Stadt isch so chli, dass mir se guet mit üsne Velos chöi erkunde. Mir bsuche Temple, schländere übere Nightmarket, probiere üs dür z'laotisch Esse, gniesse die feine exotische Frücht und relaxe zum Sunneungergang am Mekong. Hie chönnt mä guet no es paar Wuche verwilä.
Nach vier Täg geits aber witer. Mir stige uf es Slow Boat - es längs Houzboot, wo üs i zwöi Täg flussufwärts a di thailändischi Gränze bringt. Mit üs a Bord si es paar Backpacker und süsch mehrheitlech Locals, wo ungerwägs ih- und usstige. D'Fahrt isch ruhig, schön und super entspannt.
Nach eme Zwüschestopp i eme chline Dorf zum Übernachte, geits am nächschte Morge uf eme angere Boot witer. Mir läse, spile und beobachte z'Läbe uf und näbem Mekong. Chinder plantsche im Wasser, Eutere wäsche ihri Chleider und immer widr entdecke mer Wassbüfu am Ufer. Dr Mekong fliesst über 4'900 Kilometer Lengi dür China, Myanmar, Laos, Thailand, Kambodscha und Vietnam und isch e wichtigi Läbensgrundlag für vili Mönsche und Tier.
Nach zwöitägiger Fahrt erreiche mer am Abe üses Ziu. Dr Mekong biudet hie d’Gränze zwüsche Laos und Thailand. Mitem Velo fahre mer über d'Brügg nach Chiang Khong.
Üsi Route:
✉️ Blog Updates: Mäud di hie ah, we de über nöii Biträg wosch informiert wärde.