Sawadee
Thailand Teil I - Vo Chiang Khong nach Chiang Rai mit eme Umwäg i Norde nach Chiang Dao u vo dert witer nach Chiang Mai.
Sawadee kaaa Thailand! Nach mehrere Etappe mitem Zug und ere Bootsfahrt ufem Mekong geit üsi Reis uf zwöi Reder witer. Es füut sech guet ah zrügg ufem Velo z'si - einzig d'Sitzbeihöcker müesse sech widr a iri Ufgab gwöhne.
Üses Zieu? Thailand dr Lengi na vo Nord nach Süd z'dürquere. Di gnaui Route hei mer no nid, aber mir wüsse ungfähr wo düre und fouge üsere Luscht am Entdecke. Dr Vorteil, mir chöi spontan entscheide, wo dasses söu düre gah. Mir fahre vo Chiang Khong nach Chiang Rai. Dert erfahre mer, dass Chiang Dao ungloublech schön söu si. Mir mache dä Umwäg witer i Norde ufe u fahre vo dert när witer in Richtig Chiang Mai.
Mir merke schnäu: Thailand isch es Paradies zum Velofahre. Dr Vercher isch so entspannt wie no nie uf üsere Reis. Outos u Roller überhole üs mit grosser Distanz und i gmächlechem Tempo. Sowieso isch uf de Näbestrasse, wo mer houptsächlech fahre, nid viu los. Ab und zue chrütze üs komplett überladnigi Gfährt oder es paar Hünd, wo aber genau so entspannt si wie d'Lüt hie. D'Thailänder:inne si sehr härzlech und schine genereu immer guet glunt z'sy. Sie winke üs vom Strasserand mit eme lute "Sawadee Kaaa" (Hallo) und eme grosse Lache im Gsicht.
Nid nume verkehrstechnisch si mir im Paradis glandet, sondern es gseht o so us. D'Natur isch e einzigi Reizüberfluetig. Am Afang zeige mer vom Velo us uf Mangoböim u Papayapflanze am Strasserand - bis mer merke, dass die au paar Meter uftouche. Mir fahre entlang vo Riisfäuder, Paumewäuder, unzählige Fruchtböim und bestune di exotischi Fauna mit au ihrer Viufaut.
Thailand isch es grüens Wunderland. Zwüsche de chräftige Grüentön entdecke mer immr widr Temple und Buddha-Statue, es paar drvo si risegross und glänze goudig sichtbar us dr Ferni. Unterwägs bechöme mer o e erschte Iblick i di viufäutigi Tierwäut: Grau- u Siuberreiher i de Riisfäuder, Eidechse a de Böim, Affe ufem Dach - und o di erschti Schlange, wo vor üs über d'Strass huscht.
Am Strasserand gits di vile verschidnige Frücht in aune Farbe u Forme z'choufe - Mangos, Ananas, Papaya, Dragonfruit, Pomelo, Wassermelone, Passionsfrucht, Rambutan und vili meh - entweder ganz, gschnitte odr flüssig aus Smoothie. Regumässig lege mer e Zwüschestopp ih und gönne üs e fruchtige Snack.
Z'Ässe isch generell es rise Highlight für üs. Di Thailändischi Chuchi isch e Troum. Es git e Viuzau a köschtleche Riis- und Nuduspise. Im Zwifusfau gits e Fried Rice, we mer mau nid ganz sicher si, öb d'Chuchi de o wük früsch isch. Z'Lieblingsässe im Norde isch aber Khao Soi, e cremig-scharfi Curry-Nudusuppe, wos hie überau git.
Dr einzig Nachteil uf üsere erschte Etappe dür Thailand isch z'Timing. Im Apriu brönne vili Bure di übrigblibnige Pflanzeräschte vo de Mais- und Riis-Fäuder abe - zum Teil sis o Bärge vo Loub odr ganzi Waudstück wo grodet wärde. Dadrdür entsteit Smog mit ere höche Konzentration vo Fiinstoubpartiku. I dere "Burning Season" wärde di empfohlne Maximauwärte vor WHO regumässig um z'10 bis 20-fache überschritte. Üsi Häus chratze und d'Ouge brönne, wo mer i di Gebiet chöme. Mir hei aber Glück und si nume paar Täg drvo betroffe. Naadisna wird d'Luft widr besser und dr Fahrtwind lüftet üs düre.
Nach diverse ländleche Etappe erreiche mer Chiang Mai. Mir hei ghört, dass gli Songrkan stattfindet - z'Thailändische Neujahrsfescht. Wo mer mit dem Velo id Stadt i Richtig vo üsem Hotel fahre würkt aues ruhig. No e letschti Abbiegig id Houptstrass und de si mer scho fasch dert. Und när passierts, plötzlech befinde mer üs ire riesige Wasserschlacht. Mönsche vo jung bis aut si mit Wasserpischere und Plastigchüble bewaffnet u sprütze aues ab, wo sech bewegt. Am Strasserand stöh ganzi Familie näbe Wassertonne und uf dr Strasse sprütze d'Lüt zrügg us aune mügleche Fahrzüg. Mir si uf üsne Velos es bsunders beliebts Ziu und si sofort klatschnass. E wiukommeni Abchüelig und e rise Spass. Nach dr Akunft im Hotel bewaffne mer üs de säuber mit ere Wasserpischtole und gniesse ds wiude u fröhleche Fescht, wo ganzi 4 Täg duret.
Für d'Umgäbig von Chiang Mai z'erkunde, miete mer für paar Täg e Roller. Aber nach wenige Kilometer lande mer scho ire Polizeikontroue. Kes Problem, mir si ja thailändisch-entspannt dür d'Gägend grout. Nid ganz. E fründlechi Erklärig speter wüsse mer, dass mer e internationale Fahruswis brüchte. Drum müsse mer ufe Polizeiposchte - wos no diversi angeri Touris hett, wo offebar o ohni Billet si gfahre. Aber haub so wiud, d'Konsequenze si thailändisch relaxed: Es git e Buess vo umgrächnet 8 Franke und mir dörfe no drü Täg lang witerfahre.
Mir si überwäutigt vor troumhafte Natur, em köschtleche Ässe und dr asteckende Glasseheit. Es warte no me aus 2'000 Kilometer Strecki bis i Süde. Gly geits witer. Sawadee Kaaa (Sula) und Sawadee Kraaap (Silä)!
Üsi Route
✉️ Blog Updates: Mäud di hie ah, we de über nöii Biträg wosch informiert wärde.