Koh
Thailand Teil III - Vo Phuket mit dr Fähri nach Koh Yao Yai, witr via Koh Phi Phi nach Koh Lanta u vo dert widr zrügg ufs Festland nach Krabi und Surat Thani.
Ab i Süde! Mir befinde üs im Landesinnere und fahre entlang vom Khao Sok Nationalpark düre sattgrüen Dschungu in Richtig Indische Ozean. Und de isches o scho widr sowit, mir erreiche d’Westküste und drmit o z'Meer. Dismau am Andamanensee. D'Luft schmöckt salzig, üsi Chleider chläbe uf dr Huut u d'Paume bewege sech mitem Wind. Mir träffe uf naturbelasseni Stränd und grossi Wäue. Und d'Natur hett mau widr e Überraschig für üs bereit: Bi eme Strandspaziergang entdeckt dr Silä uf eme Ascht e wunderschöne chline Yisvogu.
Mir fouge dr Weschtküschte witer südwärts nach Phuket. Es isch e ansträngendi und unentspannti Fahrt. Dr Vrchehr isch chaotischer und grösser aus bishär. Mitem erreiche von Phuket hei mir eigentlich üses Ziu erreicht: Thailand vo Norde nach Süde z'dürquere und das füehlt säch guet a. Phuket per se isch kes Highlight. Es isch sehr touristisch und ds obwou Näbesaison isch unds im Vrglich zur Houptsaison offenbar nume öpe e Viertu vo de Lüt hett. Aber haub so wiud, mir si eh scho gli widr wäg. Nach au dene Kilometer pedale wei mir e Pouse ilege und Thailand no vore angere Site gniesse. Mir reise mitem Boot witer uf Insle (Koh) südlech vo Phuket.
Die erschte Täg verbringe mer uf Koh Yao Yai im ne Resort. Mir geniesse di wunderschöni Ussicht, z'Meer und z'usgiebige Zmorgebuffet. Was für ne Kontrascht zu de Zyte im Zäut mit dr Bialetti ufem Gaschocher und eme Haferflocke-Müesli. Dr Silä houts de mit ere Läbensmittuvergiftig zwüschezytlech zwöi Täg us de Badhose. Wär hätt dänkt, dass me usgrächnet hie e Läbensmittuvergiftig uflist, nachdäm mer während zwöi Mönet ah aune erdänkleche Orte gässe hei.
Nach eme churze Stopp uf Koh Phi Phi stüret d'Fähri nach Koh Lanta. Es isch dr zwöitletscht Tag, bevor di Verbindig wäge dr Näbesaison und em starke Monsunräge für mehreri Mönet igsteut wird.
Uf Koh Lanta steit üses Bungalow i dr Nechi vo eme schier ändlose Sandstrand. Mir geniesse die entspannti Umgäbig und befinde üs im absolute Chill-Mode. Ab und zue zeigt sech de d'Rägesaison mit eme chräftige Monsunräge.
Hie uf Koh Lanta begägne mer sit längerem o widr mau angere Bikepackers: D Cass und dr Karim us Kanada. Mir träffe sie uf es Fruchtsaft und tusche üs us über Route, Erläbniss und di witeri Plän. Paar Täg spetr fahre mer de mit ihne zäme vo Koh Lanta az Feschtland und gniesse für paar Stung d’Gmeinschaft i eme 4er-Bikepacking Peloton.
In Krabi beatrage mer d'Verlängerig vo üsem Visum. Ds geit ruck-zuck typisch fründlech und unkompliziert. Und witer geits. Üses Ziu isch Surat Thani. Mehreri Täg fahre mir mitem Velo zrügg über di Malaiischi Haubinsle ad Oschtküschte.
Nach über 2'500 Kilometer mitem Velo dür Thailand wächlse mer widr z'Fortbewegigsmittu. Während 12 Stung geits mitem Nachtzug vo Surat Thani nach Bangkok.
Üsi Route
✉️ Blog Updates: Mäud di hie ah, we de über nöii Biträg wosch informiert wärde.