Retour
Frankrich & Schwiz - Entlang vor Seine und em Canal de Bourgogne uf Dijon, düre Jura iz Val-de Travers ume Neueburgersee a Murtesee und vo dert uf Bärn.
Wo chunt die Schrube häre? Gueti Frag! Mir stöh vorem Flughafe Charles-de-Gaulle, zwüsche Sacoche und Veloteili. Es witers Mau boue mir üsi Velos zäme. Mir hei mittlerweile scho fasch chli Routine, aber ds mau si no es paar witeri Teili wos widr z'montiere git.
Üsi letschti Etappe startet in Paris, e Stadt, wo sech i de letschte Jahr zure richtige Velo-Metropole entwicklet hett. Vou bepackt fahre mer vom Flughafe iz Härz vo Paris - iz 10. Arrondissement. Schnäu erläbe mer wie guet me sech ufem Velo dür di risigi Stadt cha bewege. Chli spetr geits de ohni Gepäck witr uf Entdeckigstour.
Chloé, üse Warmshowers-Host in Paris, hett üs i ihrer wunderschöne chline Wohnig es Gäschtezimmer zwäg gmacht. Am Abe gö mer zäme gah ässe. Sie verzeut vo ihrem Job aus Journalistin und vo de Olympische Spiu im letschte Jahr. Natürlech gits o dis mau widr chli Velo-Nerd-Talk. Sie plant gli ihri erschti grösseri Velotour und hett tusig Frage a üs. Mir gäbe natürlech gärn Uskunft und müess o chli schmunzle, wüu mir wüsse, dass mir vor eme Jahr o genau i dere Situation si gsy.
Nach eme usgedehnte Zmorge mit Pains au Chocolat und eme chline Zwüschefau (Schärbi + Pneu = Platte), verlöh mer de Paris. Entlang vo dr Seine roue mer südwärts in Richtig Burgund. D Stadt verblasst, d Landschaft veränderet sech und es wird dütlech ruhiger. Die nächschte Täg si prägt vom schier ändleose Canal de Bourgogne. Längi gradi Wäge, chum Verchehr, nume ab und zu es paar Senior:inne ufem E-Bike, Schiff wo langsam ufem Kanau tuckere, es paar Vögu - und mir. Mir passiere unzähligi Schleuse, jedi mit eme chline Hüsli näbedran. Es paar drvo hei sogar es Café integriert, wo üs mit eme Espresso und eme Stück Chueche beglücke. Während däm luege mer mer zue wie d'Schiff vo dr Schleuse ufe und abe bewegt wärde.
Mir si widr zrügg am im Camping-Modus . Mehrheitlech uf Zäutplätz, aber o mau wiud a eme abglägene Étang oder im ne chline Park. Mir entwickle e neui Tagesstruktur: am Morge Gipfeli u Kaffi, am Mittag es Café complet mit Baguette, Chäs und Frücht. Am Abe de Teigware i aune mügleche Variatione.
Nach mehrerne Täg entlang vo Flüss u Känäu biege mer de nach Dijon ab i Richtig Jura. D'Landschaft wird hügeliger und wiuder. Mir geniesse di gueti Luft i de dichte Wäuder und die schöne witzogene Abfahrte.
Und de isches sowit: Vor üs ligt d'Schwizer Gränze. Mir wärde plötzlech zimlech emotionau. Ds müesse mer zersch mau verarbeite - bi eme stichfeschte Schoggijoghurt usem Migros.
D'Schwiz zeigt sech üs vo ihrer schönschte Site. Dür z'Val de Travers fahre mer uf perfekte Velowäge und übernachte uf eme chline idyllische Campingplatz. Witer geits zum Neueburgersee u vo dert witer nach Murte, wo mir zäme mit Fründe vor Sula ire Fischerhütte diräkt am See übernachte.
Üse letscht Reisetag bricht ah. Vo Murte geits nach Bärn. Voubepackt fahre mer über Bethlehem i üsi Stadt. E Kilometer vorem Ziu git no ar Sula ihri Schautig dr Geischt uf. Mit de zwöi verblibende Gäng geits no es letscht mau e Stutz ufe, bevor mer de für di letschti Abfahrt in Richtig Eichhouz abbiege.
Gschafft! Mir si retour. Surreal.
Und was iz? Zersch mau id Aare gah bade. När chöme de nadisna üsi Fründe zum plante Wikommensapéro. Was für e schöne Momänt.
D Nacht verbringe mer ufem Camping Eichhouz. Z'erschte mau i üsem Läbe, wo mer zum Ruusche vor Aare ischlafe. Kes Meer, ke See oder Lagune vo dere Wäut würde mer drgäge itusche. Zerschte wo mer am nächschte Tag isch de o e gemütleche Schwumm. I dr Aare. Dehei.
Üsi Route
✉️ Blog Updates: Mäud di hie ah, we de über nöii Biträg wosch informiert wärde.